Sardigna Pride 2013

Di Massimo Mele il 15 Giugno 2013. Nessun commento

Su 28 de lampadas de su 1969, in Nova York, po sa prima orta, lesbicas, gay e trans chi fini presentes in su locale Stonewall Inn si fini bortados contra a unu de sos medas atacos de sa justissia, cun d’una briga in sas carreras chi fit durada tres dies et tres notes. Sos Pride chi si fachent onzi annu in totu su mundu sunt s’amentu de cussa rivolta, ma fintzas meda de prus: Pride cheret narrere Orgogliu, chi po nois est orgogliu de esistentzia, de su chi semus et de su chi cherimus essere, orgogliu de essere lesbicas, gay, bisessuales, transessuales e transgender, intersessuales, queer, orgogliu de sas diferessias de onzi individualidade. Su rispetu de sas diferentzias non podet che colare po unu percursu orgogliosamente antifascista, antiratzista e antisessista, ca manc’una pessone est libera fintzas chi sas ateras sunt oprìmidas. Su Pride est unu locu de visibilidade manna, importante non solu po sas pessones lgbtiq: sa libera espressione de sos disizos e de sas identidades est un obietivu e una conchista po totus.

Sa Visibilidade po nois cheret narrere riconoschimentu sotziale, est unu caminu chi fraigamus donzi die, in sas tzitades comente in sas biddas, inube sa mancantzia de visibilidade podet jughere a s’isolamentu, a situatziones de ricatu in su logu de su tribagliu, a s’adeguamentu a su sistema eterosessista chi regulat sas vidas nostras, sas carenas nostras, sos disizos nostros. Su coming out (su de “essire a foras” e si fagher bidere e connoschere comente pessones lgbtiq) est po nois una pratica forte de a simponnere e de autodetzisione, de autodeterminatzione. Faeddamos de Autodeterminatzione comente locu de libertade de sas carenas e de sas sessualidades diferentes, autodeterminatzione de onzi pessone comente de sas collettividades, puite solu pessones autodeterminadas podent fromare comunidades autodeterminadas. Autodeteminatzione est a podere chirrare e detzidere su chi cherimus essere, riconnoschinde sas subraistruturas, categorizaztiones, divisiones sotziales e culturales (siada esternas che internas a sa cultura originale nostra, cussa sarda), chi nos definini sigunde sos duos binarios de su genere comente “omines e fèminas” e nos incasellana, nos dana sa regula e nos normalizana; est riconnoschere su sessismu chi nos passada e imparare, peri comente chi siad unu jocu, a lu distruere inventade imaginarios noos; est a podere chirrare chie amare/chin chie podere tennere relatziones de amore/sessuales; est a podere chirrare de essere o nono babos e mamas (superande duncas su chi nos imponene comente obrigu sotziale ma fintzas sas leges restritivas chi nos diant cherrere proibire de lu poder essere); est a chirrare de tennere una familia e/o de cultivare fromas noas de relatzione e sotzialidade, bogandeche sas esistentzias nostras dae sa logica de sa coppia comente unicu logu de felicidade e de relatzione.

Sapadu 29 de lampadas: su Casteddu Pride diventada Sardigna Pride. S’Isula unida jughede a dainnantis sas batallias po difendere sa comunidade lesbica gay bisessuale transessuale, transgender intersessuale e queer.

s’omofobia e sa transfobia benzan finalmente ricondotas a unu crimine de odiu, e no abbarrene in su locu de sas opiniones personales;
sas familias potana essere liberas et medas, colande po su riconnoschimentu de tou sas fromas de conviventzias e de su coju tra omosessuales;
s’adotzione non siat prus unu tabù, ma su diritu de sos fizos a tennere una familia;
su sessismu e su fèminicidiu potan essere prevenìdos chin atziones cuncretas de cuntrastu a sa violentzia;
su procedimentu po sa riatributzione de su sessu et su cambiamentu de su nomene potat essere semprificadu comente in ateros locos de s’Europa.