Sas fotos de sas Famìlias “Arcobaleno” pro sa campannia #figlisenzadiritti

Domu » Novas » Sas fotos de sas Famìlias “Arcobaleno” pro sa campannia #figlisenzadiritti

De admin su 5 Santandria 2015. manco unu cummentu

Sa chida colada Marilena Grassadonia, sa presidente noa de s’assòtziu Famìlias “Arcobaleno”, in una lìtera aberta a Renzi at fatu connòschere sa campànnia e sensibilizatzione #figlisenzadiritti

#figlisenzadirittiMarilena Grassadonia, chi leat su postu a Giuseppina La Delfa pro deghe annos presidente de s’assòtziu de mamas e babbos de omosessuales, incumintzat sa presidèntzia sua cun una campànnia de sensibilizatzione pro aprovare una lege subra de sas uniones tziviles chi pertochet finas sa possibilidade de adotare sos fìgios de sos/sas umpàngios/cumpàngias.

In Itàlia b’at chentinas de pitzinnos crèschidos dae duas mamas o dae duos babbos ma, pro sa lege, sunt fìgios de unu genitore ebbia: s’ùnicu genitore reconnòschidu est su chi tenet unu ligàmene biològicu cun su pitzinnu”. Iscriet Grassadonia in una lìtera aberta a Matteo Renzi “La stepchild adoption – chi no est sa possibilidade pro sos omosessuales de adotare e chi duncas diat èssere mègius a mutire “reconnoschimentu de su genitore de fatu” – permitit de pònnere remèdiu a custu “vulnus” dende sa possibilidade a su genitore non reconnòschidu legalmente de èssere registradu comente genitore a totu sos efetos”.
Cun s’eticheta (hashtag) #figlisenzadiritti incumintzat duncas sa maratona Twitter e Facebook de sas famìlias omogenitoriales. Deghinas de fotos de còpias de omosessuales cun fìgios sunt ispartzinadas in sa rete. “Sos oposidores de su Ddl Cirinnà narant chi su reconnoschimentu de su genitore de fatu est isballiadu ca “legìtimat sa genitorialidade omosessuale”. Sunt fàulas in subra de sa pedde de sos pitzinnos: sos omosessuales ant a sighire a tènnere fìgios ma, sena una lege, ant a tènnere mancu deretos de sos àteros, espostos a milli dificultades de cada die e cun arriscos graes in casu de lutos in famìlia, o separatziones.
unnamedSu sensu de sa campànnia est meda simpre: afirmare chi est una fàula su de nàrrere chi sas uniones tziviles o su cojuiu cun gente de su matessi sessu potzant abèrrere sas ghennas a sa genitorialidade omosessuale ca sos omosessuales los tenent giai sos fìgios. Est pròpiu pro amparare sos fìgios issoro, in pedde e ossos, chi sas Famìlias “Arcobaleno” ant pedidu a totu sas còpias omogenitoriales de publicare fotos de sas famìlias issoro. Una risposta a s’ipòtesi de lassare “libertade de cussèntzia” subra de su votu a su DDL Cirinnà, ma finas a su messàgiu chi Renzi aiat publicadu in facebook in su mese de santandria de su 2013. “In su grupu meu de traballu b’at una còpia, Letìtzia e Teresa, chi dae pagas chidas tenet unu fìgiu chi si narat Ernesto. Comente segretàriu de su PD apo a traballare pro chi Ernesto apat sos matessi deretos de fìgios meos e, a pustis de medas annos de chistiones a bòidu, amus a fàghere una lege subra de sos deretos tziviles”. “Nois – cummentat Marilena – semus galu a s’ala de Ernesto e a s’ala de totu sos pitzinnos chi, comente a issu, isetant de tènnere sos matessi deretos de sos fìgios de Matteo Renzi”.

A sa campànnia aderint finas Sìlvia e Fabiana, de Famìlias “Arcobaleno” de Casteddu, publichende in Twitter una foto paris a sas tres fìgias issoro “sas fìgias nostras tenent sambenados diferentes, sunt sorres pro totus ma pro s’Istadu nono #figlisenzadiritti”.

Custa publicatzione est disponìbile fintzas in: Italian

Pùblica unu cummentu