S’Alighera 2014: unu Pride internatzionale in su tzentru de su Mediterràneu

Domu » Novas » S’Alighera 2014: unu Pride internatzionale in su tzentru de su Mediterràneu

De admin su 13 Freàrgiu 2014. 37cummentos

Est oramai ufitziale: su Sardegna Pride 2014 at a èssere in s’Alighera su 28 de làmpadas. Lu comùnicat su MOS (Movimentu Omosessuale Sardu), s’assòtziu chi si òcupat de s’aparitzamentu de s’eventu, promòvidu dae su coordinamentu sardu LGBTQ. 

corteoSu Pride (“Ondra” in sardu) est un’affussione chi torrat cada annu e ammentat sa prima rebellia de gay, lesbianas e trans a sas ofensas suprias de sa politzia in s’atesu 28 de làmpadas 1969 in su tzilleri Stonewall de New York. Dae insandus, cada annu, est cussa sa data sìmbulu pro sas manifestadas de pretesa de sos deretos e de sas libertades gay, lesbianas e trans, sas ormai fentomadas isfiladas de s’ondra LGBTQ o Pride.
A 45 annos de distàntzia, fintzas sa Sardigna si preparat a falare in pratza pro sos deretos de gay, lesbianas e trans e pro sa tzitadinàntzia prena de totus e totas, in sa de duos editzione de su Sardegna Pride, sa manifestada chi dae su 2013 bidet isfilare su pòpulu LGBTQ paris a millas de persones pro nàrrere de nono a s’omofobia e a onni forma de discriminatzione e de òdiu.
At a èssere su pomposu mare de s’Alighera, sa Bartzellona minoredda, a fàghere de guarnessia a s’isfilada manna chi, sàpadu 28 de làmpadas 2014, at a tancare una chida de initziativas cun dibatas, mustràntzias, tzìnema, teatru, festas e ispetàculos. S’acumpangiamentu at a crusiare sas carreras printzipales de sa tzitade, bordigiende sas galanas prajas aligheresas de Maria Pia e de su Lido, pro nde agabbare in su portu, ue b’at a èssere su cuntzertu de serru de custu mannu eventu sardu.
Su caminu de su Sardegna Pride at a cumintzare a maju e programmat unu calendàriu tipidu de initziativas chi, dae su 17 de maju, die mundiale contra s’omofobia, ant a crusiare sa Sardigna pro concruire in sa manifestada manna de su 28 de làmpadas in s’Alighera.
Su tema seberadu pro s’editzione 2014 est: “sessualidade, sessuofobia, omofobia”. Ma s’ant a agatare fintzas àteras temàticas che sas famìlias gay e lesbianas, s’omogenitorialidade, su bullismu e sa formatzione de una cultura de su respetu e de sa diferèntzia.

Custa publicatzione est disponìbile fintzas in: Italian

37 Responses to S’Alighera 2014: unu Pride internatzionale in su tzentru de su Mediterràneu

Pùblica unu cummentu