4 sentinellas tristas e solas: unu fallimentu s’addòviu tataresu

Domu » Novas » Novas Sardigna » 4 sentinellas tristas e solas: unu fallimentu s’addòviu tataresu

De admin su 14 Santugaine 2015. manco unu cummentu

sentinelle_sassariEst istadu unu fallimentu ispantosu su de tres addòvios de sas Sentinellas ritzas. Cun su passaparàula a boghe, in Facebook e WhatsAp, sas Sentinella ritzas de Tàtari si sunt dadas apuntamentu sàbadu coladu su 10 de santugaine pro su de tres addòvios de s’omofobia in pratza de Itàlia in Tàtari. Pagos nd’ant leadu parte, intre custos su chi b’est semper, su cussigieri regionale de su PSd’Az Marcello Orrù (chi forsis diat pòdere impreare mègius su tempus a si difèndere in sos protzessos).

Su fundamentu polìticu de custu movimentu de fanàticos est semper su matessi: contra a su ddl Scalfarotto (chi diat illarghiare sa lege contra a sos crìmines de òdiu e finas de omofobia e transfobia), contra a su ddl Cirinnà subra de sas Uniones Tziviles e, duncas, contra a s’introduida de programmas pro ispainare s’ideologia de su gènere (“ideologia gender”) in sas iscolas.

Unu programma “de luta” chi, imbetzes de lutare pro deretos noos, chircat de impedire chi sos deretos bèngiant reconnòschidos. Ispantosu ma veru: non cherent chi àteros tzitadinos e tzitadinas apant sos matessi deretos chi tenent issos.

“Contrariamente a su 17 de maju, custa bia amus detzisu de no los carculare” nos at naradu Bàrbara Tetti, presidente de su MOS. “Faghet bènnere una tristura manna su fatu chi b’apat calicunu chi manifestat publicamente contra a sos deretos de sos àteros. Mi paret chi non siat egoismu ma avilimentu de chie no est cuntentu de sa vida sua. Sas persones cuntentas no òdiant, lu faghent setzi cussas tristas e solas”. Pro su chi pertocat sa partetzipatzione paga at rispostu “forsis calicunu est aberende sos ogros e s’est abigiadu chi, a illarghiare una lege chi b’est giai, no annanghet perunu reatu nou (Decretu Mancino ndr) e chi reconnòschere sas Uniones Tziviles non nche bogat nudda a sa famìlia chi issos cherent amparare. Sas famìlias sunt in crisi ca no ant dinare pro campare, e non ca sos omosessuales si cherent bene”. E s’ideologia de su gènere? Bàrbara Tetti riet e pesat sos ogros a chelu “No isco ite cheret nàrrere, dimanda·lu a chie l’at imbentada”.

Custa publicatzione est disponìbile fintzas in: Italian

Pùblica unu cummentu